Bəlli bir həqiqətdir ki, Azərbaycan polisi —Daxili İşlər Nazirliyinin strukturuna daxil olmaqla bərabər, “Polis haqqında” Qanununa əsasən, Azərbaycan Respublikasının icra hakimiyyətinə mənsub vahid mərkəzləşdirilmiş hüquq-mühafizə orqanıdır. Xalqımızın ümummilli lideri, mərhum prezidentimiz Heydər Əliyevin 1998-ci il 24 may tarixli fərmanı ilə, Azərbaycan Xalq Cümhuriyyəti Daxili İşlər Nazirliyinin tərkibində ilk polis orqanlarının təsis edildiyi gün - 2 iyul “Azərbaycan Polisi Günü” elan olunmuşdur. Hər kəs o haqda da məlumatlıdır ki, Azərbaycanda daxili işlər orqanlarının inkişafı ulu öndər Heydər Əliyevin xidmətləri sayəsində mümkün olmuşdur. 1969-cu ildə Ümummilli Liderimiz Azərbaycana Respublikasına rəhbərlik etməyə başladıqdan sonra, daxili işlər orqanlarına qarşı dövlət qayğısı artırılmış, vətəninə və xalqına sədaqətli kadrların irəli çəkilməsinə, əməkdaşların vətənpərvərlik, milli dəyərlər əsasında təlim-tərbiyəsinə, peşəkarlığın yüksəldilməsinə və s. xüsusi diqqət göstərilmişdir. Həmin illərdən başlayaraq şəxsi heyyətin milli dövlətçilik ideologiyası əsasında formalaşdırılmasına başlanmışdır. Azərbaycan Respublikası ikinci dəfə müstəqillik hüququnu əldə etdikdən və 1993-cü ildə xalqın təkidli tələbi ilə ulu öndər Heydər Əliyevin yenidən hakimiyyətə qayıdışından sonra, hüquq-mühafizə orqanlarının yeni inkişaf mərhələsinin əsası qoyuldu. Həyata keçirilən kadr islahatları peşəkarlığın artırılmasına, xidmətin səmərəli şəkildə təşkilinə zəmin yaratdı. Qanunların aliliyinin təmin olunması, dövlətçilik prinsiplərinin ön plana çəkilməsi və digər addımların atılması səbəbindən, ölkəmizdə cinayətkarlığa qarşı mübarizə tədbirlərinin möhkəm təməli qoyuldu, vətəndaşların dinc, rahat yaşamaları üçün lazımi şərait yaradıldı.

Bəli, bu gün Azərbaycan Respublikasının Prezidenti cənab İlham Əliyevin həyata keçirdiyi müdrik siyasət nəticəsində, polis əməkdaşları ölkəmizdə sabitliyin və asayişin qorunması yöndə ardıcıl addımlarını atmaqda davam edirlər. Vətəndaşların məruz qala biləcəyi hüquqazidd əməllərə qarşı, məhz təxirəsalınmaz tədbirlər həyata keçirilir. Bütün bunlar cinayətkarlığa qarşı mübarizədə daxili işlər orqanı əməkdaşlarına əlavə stimul verir. Hal-hazırda ölkəmizdə möhkəm təməl üzərində formalaşmış ictimai-siyasi sabitlik hökm sürür, Konstitusiya ilə təsbit olunmuş insan və vətəndaş hüquq və azadlıqlarının etibarlı təminatı həyata keçirilir.

Bəlli bir həqiqətdir ki, DİN-nin hər bir əməkdaşına qarşı dövlətimizin diqqət və qayğısı günü-gündən artır. Son illər daxili işlər orqanlarının maddi-texniki bazası ən müasir səviyyəyə çatdırılmış, fəaliyyətləri günün tələbləri səviyyəsində təşkili olunmuşdur. Ötən illər ərzində bütün ərazi polis orqanlarının inzibati binaları yenidən qurulmuş, xidməti avtomobilləri yeniləri ilə əvəz olunmuş, müasir informasiya-kommunikasiya texnologiyaları ilə təminatları yaxşılaşdırmışdır. Hal-hazırda DİN-ə tabe olan bütün qurumlarda çalışan əməkdaşlar üzərinə düşən vəzifələri məsuliyyətlə yerinə yetirir, açıq-aşkar şəkildə cinayətkarlığın bütün forma və təzahürlərinə qarşı mübarizədə prinsipial mövqe tutur, vətəndaşların azad və təhlükəsiz yaşamaları üçün zəruri tədbirlər həyata keçirirlər. Belə ki, daxili işlər naziri cənab Vilayət Eyvazovun imzaladığı fərman, sərəncam və verdiyi tapşırıqlar, qarşıya qoyduğu vəzifələr hər bir polis əməkdaşı tərəfindən uca tutulur və onlar üzərlərinə düşən çətin və məsuliyyətli missiyanı əzmkarlıqla yerinə yetirirlər. Son aylar ərzində daxili işlər orqanı əməkdaşlarının məsuliyyətləri daha da artmış və onların dövlətimiz, xalqımız qarşısında gördüyü işlər daha da məhsuldar olmuşdur. Bir anlığa diqqət yetirək ki, son bir neçə aydır ki, dünyanı ağuşuna alan karonavirus (COVİD-19) infeksiyasının ölkəmizin ərazisində yayılma riski artarkən, DİN-nə tabe olan qurumlar, ələlxüsus Əlahiddə Çevik Polis Alayının şəxsi heyyətinin daha çox hissəsi bu yöndə aparılan mübarizə tədbirlərinə cəlb olundular. Belə ki, təkcə paytaxt Bakı şəhərində deyil, ətraf şəhər və rayonlarda polis əməkdaşlarının karantin rejimi ilə bağlı işlərə səfərbər olunmaları, məhz hər kəsin gözləri önündə olub. Bəli, hər bir polis əməkdaşı cənab Prezidentin çağırışına yekdil səs verdilər, Operativ Qərəgahın çıxarmış olduğu qərarların icraasını yerinə yetirdilər, bir sözlə bu gün də bu yöndə addımlarını atmaqda davam edirlər.

Vəsilə Abulova

“Azərbaycan Dəmir Yolları” QSC - nın, Maliyyə idarəsinin rəis müavini